للأسف فوجئت برأى كثير من الذين لم يوافقوا على التوقيع وكان فيه سبيبن بارزين:
* مالوش لازمه وكلام فاضى هانقعد ننبح فى صوتنا والحكومة هاتعمل اللى هيا عايزاه
* وفيه اللى ربط البيان بالإخوان وقال لا دى مش ناقصة خراب مش علشان نخرج من مصيبة نحط نفسنا فى مصيبة أكبر ويقصد طبعا وصول الإخوان للحكم
الرأى الأول ده صدمنى مع إنى كنت متوقعه لأن هيا دى مشكلتنا الحقيقية وهى السلبية وهى أكبر سبب فى اللى احنا فيه ولازم يعرفوا انهم اللى مضيعين حقهم بسكوتهم وخوفهم وضعفهم وعلى رأى المثل اللى بيقول يا فرعون ايه فرعنك قال مالقيتش حد يلمنى
ويقول الله سبحانه وتعالى فى كتابة على العزيز عن فرعون " فاستخف قومه فأطاعوه "
وفيه حكمة بتقول " ما ضاع حق ورائه مطالب "
وأما الرأى الثانى فده غريب وما كنتش متوقعه لأن بالعقل كده لو البيان ده للإخوان ماكنش لا البرادعى ولا بقية أحزاب المعارضة وقفوا معاهم وبعدين لو قرأنا السبع مطالب كويس هانتأكد انها مطالب عامه لمصلحتنا كلنا مش لمصلحة شخص أو جماعه بعينها
- انهاء حالة الطوارئ
- تمكين القضاء من الإشراف على الانتخابات
- الرقابة على الإنتخابات من قبل منظمات المجتمع المدنى المحلى والدولى
- توفير فرص متكافئة فى وسائل الإعلام لجميع المرشحين
- تمكين المصريين فى الخارج من التصويت
- كفالة حق الترشح فى الإنتخابات الرئاسية لكل المصريين وقصر مدة الرئاسة على فترتين
- الإنتخاب يكون عن طريق الرقم القومى
والفكرة يا جماعه مش فى التوقيع على البيان وبس الفكرة أن احنا نكون مقتنعين بالبيان وبضرورة التغيير بكل الطرق المتاحه يعنى فرضا أن البيان ما جابش نتيجة يبقى نشوف فكره جديدة وما نسكتش ولا نرضى بأقل من حقنا
وحشتونى كتير جدا جدا وأسف انى مش بقدر أتابعكم بالشكل الكافى نظرا لضيق الوقت فى رمضان جدا
كل عام وأنتم بخير
